Fasnacht z'Aesch bigott

Sujet 2024: alles im Sagg!

Blaggeddevärs

ALLES IM SAGG! 

Syt 50 Joor gits z Aesch bigott, 
was e Faasnachtshäärz gäärn wott. 
Do wird gschränzt und döörte pfiffe
und an schaarfe Väärssli gschliffe.

Vo de Wääge räägnets Räppli
mänggem Binggis voll uff s Chäppli. 
Und als Danggschöön für dä Sääge
duesch als stolz es Blüemli trääge.

D Gugge zien duur d Aescher Stroosse
drummle, fääge und sii bloose 
fescht in iiry Inschtrumänt, soo, 
als hätt die Zytt käi Änd. 

S Fasnachtsfüür ganz zum Schluss 
isch für jeede doch es „Muss“. 
D Erinnerig ans bunte Tryybe 
wird e Joor im Häärze blyybe. 

Syt 50 Joor gits z Aesch bigott, 
was e Faasnachtshäärz gäärn wott.  
Damit au alles funggtioniert, 
wird quer duurs Joor organisiert 
Dangg dääne Lüt laufts immer rund, 
isch d Fasnacht z Aesch all Joor so bunt. 

S Comité isch top uff Zagg –  
syt 50 Joor ‘Alles im Sagg!‘